SOCAR-ın 2023-cü ilin 3-cü rübü üzrə qazma, hasilat, emal və ixrac göstəricilərinə dair məlumat

Yerli
07 Noyabr 2023

Cari ilin üçüncü rübündə Azərbaycan Respublikası Dövlət Neft Şirkəti (SOCAR) tərəfindən 15 min metrdən¹ çox qazma işləri həyata keçirilib. Hesabat dövründə şirkət tərəfindən 2 milyon tona² yaxın neft, 2 milyard kubmetrə³ yaxın qaz hasil olunub və neft hasilatında cüzi artım qeydə alınıb. Ölkə üzrə ümumilikdə 7,5 milyon tondan⁴ çox neft və 12 milyard kubmetr⁵ qaz hasil edilib. Qaz hasilatı ötən ilin müvafiq dövrü ilə müqayisədə 9,4% artıb.

Hesabat dövründə SOCAR tərəfindən dünya bazarlarına 4,4 milyon tondan⁶ çox xam neft, Gürcüstan bazarına isə təqribən 71 milyon kubmetr⁷ təbii qaz ixrac olunub. Qeyd edək ki, SOCAR öz imkanları ilə hasil etdiyi neftdən əlavə olaraq beynəlxalq konsorsiumlar çərçivəsində SOCAR və Azərbaycanın payına düşən neft həcmlərini ixrac edir. Ümumilikdə cari dövrdə ölkə üzrə 5,8 milyard kubmetrdən⁸ çox qaz ixrac edilib. Qaz ixracında ötən ilin analoji dövrü ilə müqayisədə 12,9% artım qeydə alınıb.

Şirkətin Azərbaycandakı emal kompleksində 1,6 milyon tona⁹ yaxın neft, 811 milyon kubmetrə¹⁰ yaxın təbii qaz emal olunub. Rüb ərzində SOCAR-ın Azərbaycandakı müəssisələrində istehsal olunan 592 min ton¹¹ neft, neft-kimya və qaz-kimya məhsulu xarici ölkələrə ixrac edilib və ötən ilin müvafiq dövrü ilə müqayisədə cüzi artım qeydə alınıb. Hesabat dövründə ölkə ərazisində təbii qaz istehlakı təqribən 2,5 milyard kub metr¹² təşkil edib.

Qeyd: Mətndə istifadə olunan rəqəmlər oxunaqlılıq məqsədilə yuvarlaqlaşdırılıb. Tam dəqiq rəqəmlər müvafiq olaraq, aşağıdakı istinadlarda göstərilib.

15.232 metr
1.967.597 ton
1.987.970.000 kubmetr
7.539.673 ton
12.009.190.000 kubmetr
4,434,438.445 ton
71.125.000 kubmetr
5.819.356.000 kubmetr
1.593.210 ton
810.867.625 kubmetr
591.694 ton
2.486.221.000 kubmetr