Heydər Əliyev adına NEZ-in Mərkəzi Laboratoriyası beynəlxalq TÜRKAK/MRA akkreditasiyasını keçib
Macarıstanla enerji tərəfdaşlığının inkişafı müzakirə edilib
![Macarıstanla enerji tərəfdaşlığının inkişafı müzakirə edilib](https://enerjiportali.az/wp-content/uploads/2024/06/3I1A6568-copy-1160x560.jpg)
Bakı Enerji Forumu çərçivəsində energetika naziri Pərviz Şahbazovun Macarıstanın xarici işlər və ticarət naziri Peter Siyarto və energetika naziri Csaba Lantos ilə görüşləri olub.
Xarici işlər və ticarət naziri Peter Siyarto ilə görüşdə Avropaya qaz təchizatındakı vəziyyət və ikitərəfli enerji əməkdaşlığının inkişafı nəzərdən keçirilib. Neft-qaz layihələrində Macarıstan şirkətləri ilə tərəfdaşlıq əlaqələrinin genişləndirilməsi, həmçinin “Xəzər-Qara dəniz-Avropa Yaşıl Enerji Dəhlizi” layihəsinin həyata keçirilməsindən irəli gələn məsələlər müzakirə edilib. Dörd ölkə arasında yaşıl enerjinin inkişafı və ötürülməsi üzrə nazirlərin sonuncu iclasının nəticələrindən və Birgə Müəssisənin yaradılması proseslərinin gedişatından məmnunluq ifadə edilib. Layihənin icrasının digər mühüm komponentləri üzrə növbəti addımlar razılaşdırılıb.
Macarıstanla karbohidrogen və “yaşıl enerji” sahələrində əməkdaşlıq məsələlərinin müzakirəsi energetika naziri Csaba Lantos ilə görüşdə də davam etdirilib. Macarıstanın qaza tələbatı və idxalın şaxələndirilməsi kontekstində Azərbaycan qazının Macarıstan bazarına çatdırılmasının əhəmiyyətindən bəhs olunub. MOL və MVM şirkətləri ilə neft-qaz layihələrində əməkdaşlığın perspektivləri nəzərdən keçirilib. Həmçinin hər iki ölkədə bərpa olunan enerji kursu və Azərbaycandan Macarıstana “yaşıl enerji dəhlizi” vasitəsilə elektrik enerjisinin tədarükünə dair fikir mübadiləsi aparılıb.