bp-nin baş icraçı direktorunun Azərbaycana səfəri

bp-nin baş icraçı direktoru Meq O’Nil və şirkətin hasilat və əməliyyatlar üzrə icraçı vitse-prezidenti Qordon Birrel Azərbaycana planlaşdırılmış ikigünlük işgüzar səfərləri çərçivəsində Azərbaycan Respublikasının Prezidenti cənab İlham Əliyev tərəfindən qəbul olunublar. Səfər proqramı çərçivəsində onlar həmçinin Baş nazir Əli Əsədov, iqtisadiyyat naziri Mikayıl Cabbarov və energetika naziri Pərviz Şahbazovla görüşüblər.

Görüşlərdə bp-nin Azərbaycanla bağlı uzunmüddətli öhdəliklərinə sadiqliyi, eləcə də innovasiya, dayanıqlılıq və inkişaf istiqamətində ortaq məqsədlər müzakirə olunub. Müzakirələr Azəri-Çıraq-Günəşli yatağının sərbəst təbii qaz ehtiyatlarının işlənməsi və Şahdəniz yatağının işlənməsinin növbəti mərhələsi olan Şahdəniz Kompressiya layihəsini də əhatə edib. Tərəflər həmçinin Qarabağ və Əşrəfi – Dan Ulduzu – Aypara (ƏDUA) layihələri, eləcə də Şəfəq günəş elektrik stansiyası və Səngəçal terminalının elektrikləşdirilməsi çərçivəsində aparılan işləri müzakirə ediblər.

İqtisadiyyat Nazirliyində keçirilmiş görüş zamanı nazir Mikayıl Cabbarov və Meq O’Nilin iştirakı ilə iki Anlaşma Memorandumu imzalanıb:

• İqtisadiyyat Nazirliyi ilə bp arasında hazırda Nazirliyin rəhbərliyi altında yaradılmaqda olan yüksək məhsuldarlıqlı hesablama (HPC) infrastrukturu ilə bağlı əməkdaşlığa dair Anlaşma Memorandumu; və

• SOCAR ilə bp arasında enerji sahəsində uzunmüddətli əməkdaşlığın təşviqi, daha da möhkəmləndirilməsi və genişləndirilməsinə dair Anlaşma Memorandumu.

Səfər proqramına bp-nin Azərbaycan, Gürcüstan və Türkiyə üzrə rəhbər heyəti ilə görüşlər, bp-nin regional işçi heyəti ilə ümumi görüş, həmçinin bp-nin əməliyyatçısı olduğu Səngəçal terminalına səfər də daxil idi.