SOCAR ilə Rumıniyanın “ROMGAZ” şirkəti arasında Anlaşma Memorandumu imzalanıb

2022-ci il oktyabrın 19-da Azərbaycan Respublikasının Dövlət Neft Şirkəti (SOCAR) ilə Rumıniyanın “ROMGAZ” şirkəti arasında Anlaşma Memorandumu imzalanıb.

Memoranduma əsasən, tərəflər 2009-cu il 28 sentyabr tarixində Buxarestdə imzalanmış “Azərbaycan Respublikası və Rumıniya arasında strateji tərəfdaşlığın yaradılmasına dair razılaşma haqqında” Birgə Bəyannamədə müəyyən olunmuş prinsiplərin həyata keçirilməsi məqsədilə enerji sahəsində əməkdaşlığın daha da genişləndirilməsi barədə razılığa gəliblər.

Şərqi Avropanın ən böyük təbii qaz hasilatçılarından biri və Rumıniyanın əsas təchizatçısı olan “ROMGAZ” ölkənin ümumi təbii qaz istehlakının təqribən 40 faizini qarşılayır.