2022-ci ilin II rübündə qazma, hasilat, emal və ixrac göstəricilərinə dair məlumat

2022-ci ilin ikinci rübündə SOCAR qazma üzrə əhəmiyyətli artıma nail olub. Şirkət tərəfindən 20 min metrə¹ yaxın qazma işləri həyata keçirilib ki, bu da ötən ilin müvafiq dövrü ilə müqayisədə 41,5% çoxdur.Hesabat dövründə şirkət tərəfindən 1,9 milyon tondan² çox neft, 2 milyard kubmetrə³ yaxın qaz hasil olunub. Ölkə üzrə ümumilikdə 8,1 milyon tondan⁴ çox neft və 11,6 milyard kubmetrdən⁵ çox qaz hasil edilib. Dövr ərzində ölkə üzrə qaz hasilatı 16,7 % artıb.

Hesabat dövründə SOCAR tərəfindən dünya bazarına 4,9 milyon tondan⁶ çox xam neft, Gürcüstan bazarına isə 144 milyon kubmetrə⁷ yaxın təbii qaz ixrac olunub. Ümumilikdə isə ölkə üzrə qaz ixracı 36% artımla təqribən 5,5 milyard kubmetrə⁸ yüksəlib. SOCAR-ın dünya bazarına ixrac etdiyi neftin həcmi ötən ilin analoji dövrü ilə müqayisədə 17,6%, Gürcüstana ixrac etdiyi qaz həcmləri isə 48,1% artıb. Qeyd edək ki, SOCAR öz imkanları ilə hasil etdiyi neftdən əlavə beynəlxalq konsorsiumlar çərçivəsində SOCAR və Azərbaycanın payına düşən neft həcmlərini də ixrac edir.

Şirkətin Azərbaycandakı emal kompleksində 1,2 milyon tona⁹ yaxın neft, 869 milyon kubmetrə¹⁰ yaxın təbii qaz emal olunub. Qaz emalı ötən ilin müvafiq dövrü ilə müqayisədə 6,1% artıb. Rüb ərzində SOCAR-ın Azərbaycandakı müəssisələrində istehsal olunmuş 403 min tondan¹¹ çox neft, neft-kimya və qaz-kimya məhsulu xarici ölkələrə ixrac edilib. Hesabat dövründə ölkə ərazisində təbii qaz istehlakı ötən ilin analoji dövrü ilə müqayisədə 3% artaraq 2,2 milyard kubmetr¹² təşkil edib. “Karbamid” və “Metanol” zavodlarının istehsal həcmlərinin artımı, həmçinin ölkədə qazlaşdırma səviyyəsinin yüksəlməsi qaz istehlakının artımını şərtləndirib.

Qeyd: Mətndə qeyd olunan rəqəmlər oxunaqlılıq məqsədi ilə yuvarlaqlaşdırılıb. Tam dəqiq rəqəmlər müvafiq olaraq, aşağıdakı istinadlarda göstərilib.

¹19.874 metr

²1.940.164 ton

³1.955.624.516 kubmetr

⁴ 8.126.031 ton

⁵11.613.518.460 kubmetr

⁶4.934.277 ton

⁷143.797.469 kubmetr

⁸5.454.456.000 kubmetr

⁹1.151.720 ton

¹⁰868.848.122 kubmetr

¹¹403.484 ton

¹²2.223.116.000 kubmetr